حوسێن مه‌ده‌نی: به‌ره‌ی په‌كه‌كه‌ له‌ لاوازبووندایه‌

مه‌ده‌نی، له‌ دیمانه‌یه‌كدا له‌گه‌ڵ “وشه‌”، دووپاتی ده‌كاته‌وه‌ كه‌ ده‌ره‌نجامی رووداوه‌ نێوده‌وڵه‌تی و ناوچه‌ییه‌كان، به‌ لاوازبوونی به‌ره‌ی پارتی كرێكارانی كوردستان (په‌كه‌كه‌)‌ و به‌هێزبوونی به‌ره‌ی پارتی دیموكراتی كوردستان، كۆتاییان پێ دێت.

مه‌سعود بارزانی سه‌رۆكی هه‌رێمی كوردستان له‌ دوا سه‌ردانیدا بۆ ئه‌مه‌ریكا و كۆبوونه‌وه‌ی له‌گه‌ڵ به‌رپرسانی كۆشكی سپیدا، باسی له‌ ده‌وڵه‌تی كوردی كردووه‌ و ئه‌مه‌ریكاش وه‌ك پێشتر، به‌ربه‌رست نه‌بووه‌، چۆنه‌ ئه‌مه‌ریكا گلۆپی سه‌وز بۆ سه‌ربه‌خۆیی كوردستان داده‌گیرسێنێ؟

ئه‌وه‌ ته‌نیا كاری باراك ئۆباما نییه‌، به‌ڵام سیاسه‌تی ستراتیژیی خودی ده‌وڵه‌تی ئه‌مه‌ریكایه‌ و له‌ چوارچێوه‌ی نه‌خشه‌ی رۆژهه‌ڵاتی گه‌وره‌دایه‌ و كوردستانی گه‌وره‌یشی تێدایه‌. له‌ ئه‌مه‌ریكا هیچ كاتێك به‌ گۆڕینی سه‌رۆك، سیاسه‌ته‌ ستراتیژییه‌كان ناگۆڕدرێن، به‌ڵكو هه‌ر كامه‌یان درێژه‌ی پێ ده‌ده‌ن. ئه‌و نه‌خشه‌یه‌ له‌ سه‌رده‌می جۆرج بۆشدا ئاشكرا كرا و ئه‌وكاتیش وڵاته‌ عه‌ره‌بییه‌كان به‌ ته‌واوی دژی وه‌ستان و پێیان وابوو هیچ گۆڕانكارییه‌ك روو نادات، به‌ڵام به‌هاری عه‌ره‌بی رای زۆربه‌ی وڵاتانی گۆڕی. ئه‌گه‌ر سه‌رنج بده‌ینێ، به‌هاری عه‌ره‌بی ئه‌و وڵاتانه‌ی گرته‌وه‌ كه‌ دیكتاتۆرییه‌ت تێیدا حاكم بووه‌ و سیسته‌می كۆماریان هه‌بووه‌ و پێوه‌ندیی پته‌ویان له‌گه‌ڵ یه‌كێتیی سۆڤیه‌تی جاران و رووسیای ئێسته‌دا هه‌بووه‌، وه‌ك میسر و سووریا و لیبیا.

ئێرانیش له‌و ناوچه‌یه‌یه‌ و سیسته‌مه‌كه‌ی كۆمارییه‌ و له‌ رووسیا نزیكه‌‌، ئه‌ی بۆ گۆڕانكارییه‌كان ئه‌و وڵاته‌ی نه‌گرته‌وه‌؟

ئێران، كاریكاتێرێكه‌ له‌ دیموكراسی و په‌یوه‌سته‌ به‌ ویلایه‌تی فه‌قیه‌ و دیكتاتۆرییه‌تی ئاینی. ئێران وڵاتێكی شیعیی به‌هێزه‌ و ئه‌مه‌ریكاش ده‌یه‌وێ له‌ هاوسه‌نگییه‌كاندا، ئێران له‌ به‌رامبه‌ر وڵاتانی سوننه‌دا هه‌بێت. ئه‌وه‌ به‌و مانایه‌ نییه‌ كه‌ هه‌موو هه‌ڵسوكه‌وته‌كانی ئێران، به‌دڵی ئه‌مه‌ریكایه‌ و زۆر جار دژایه‌تی به‌رژه‌وه‌ندییه‌كانی ئه‌مه‌ریكای كردووه‌. كۆماری ئیسلامیی ئێران ته‌نگژه‌ دروست ده‌كات و له‌و رێگه‌یه‌وه‌ هه‌م خۆی ده‌پارێزێ و هه‌میش وڵاتانی تری پێیه‌وه‌ سه‌رقاڵ ده‌كات. ئێران له‌ رێگه‌ی هه‌ندێ سیاسه‌ت و دروستكردنی ته‌نگژه‌وه‌، هه‌موو وڵاتانی عه‌ره‌بی هاروژاندووه‌ و ترساندووینی. وه‌ك كاردانه‌وه‌یش، وڵاتانی عه‌ره‌بی له‌ ترسان په‌نا بۆ وڵاتانی رۆژئاوا ده‌به‌ن و چه‌كیان لێ ده‌كڕن. ئێران له‌ ته‌نگژه‌یه‌كدا كه‌ دروستی ده‌كات، سوود به‌ وڵاتانی رۆژئاواییش ده‌گه‌یه‌نێ. ئه‌مه‌ریكا ئه‌وه‌ی له‌ به‌رچاوه‌، هاوكات كه‌ ئێران لایه‌نێكی هه‌ڕه‌شه‌كاره‌،  هاوسه‌نگی هێز له‌ ناوچه‌كه‌دا دروست ده‌كات و سوودی ئابووریشی هه‌یه‌. ئێران به‌هۆی ئه‌و سیاسه‌ته‌وه‌، خۆی راگرتووه‌. بۆیه‌ له‌گه‌ڵ ئه‌وه‌ی كه‌ زۆربه‌ی وڵاتان ئاڵوگۆڕیان به‌سه‌ردا هاتووه‌، له‌ ئێران هیچ باس نییه‌. له‌گه‌ڵ ئه‌وه‌شدا له‌ سیاسه‌تی ناوخۆدا سه‌ركه‌وتوو نه‌بووه‌ رای جیهانی له‌گه‌ڵیدا نییه‌، بۆیه‌ ئه‌مه‌ریكا ناتوانێ تا كۆتایی به‌ بێ ده‌نگی بمێنێته‌وه‌.

كه‌وایه‌ تا كه‌ی ئێران به‌و شێوه‌یه‌ و به‌ بێ گۆڕانكاری ده‌مێنێته‌وه‌؟

ئێسته‌ ئه‌مه‌ریكا هانی ئێرانی داوه‌ كه‌ له‌ یه‌مه‌ن، پشتگیریی له‌ حووسییه‌كان بكات. ئه‌وه‌ داوێكه‌ بۆ ئێران داندراوه‌ و ئێسته‌ش تێی كه‌وتووه‌. حووسییه‌كان لایه‌نگری ئێرانن و عه‌لی عه‌بدوڵا ساڵح سه‌رۆك كۆماری پێشوو، سه‌ر به‌ رووسه‌كانه‌، كه‌وایه‌ هاوكارییه‌كی نزیكی ئێران و رووسیا له‌ یه‌مه‌ندا ده‌بیندرێ و ئه‌مه‌ریكا ئه‌وه‌ قبووڵ ناكات. هه‌ر به‌و هۆیه‌وه‌یه‌ كه‌ پشتگیری له‌ هێزی ئاسمانی هاوپه‌یمانیی وڵاتانی عه‌ره‌بی بۆ لێدانی حووسییه‌كانی یه‌مه‌ن ده‌كات. هاوكات سعوودیه‌ بۆ تۆڵه‌سه‌ندنه‌وه‌ له‌ ئێران، پێوه‌ندیی به‌ رووسه‌كانه‌وه‌ كرد بۆ ئه‌وه‌ی پێگه‌ی ئێران له‌ ناوچه‌كه‌دا زۆر لاواز بكه‌ن. ئه‌گه‌ر ئه‌و سه‌ودایه‌ سه‌ر بكه‌وێت، پێگه‌ و هێزی سعوودیه‌ له‌ ناوچه‌كه‌دا رۆژ به‌رۆژ زیاتر ده‌بێت. له‌لایه‌كی تره‌وه‌ ئێران، دژایه‌تیی ته‌واو له‌گه‌ڵ ده‌وڵه‌تی كوردی ده‌كات. هۆیه‌كه‌یش ئه‌وه‌یه‌ كه‌ كوردستان له‌ رووی سامانی سروشتی و به‌تایبه‌ت نه‌و‌ته‌وه‌ ده‌وڵه‌مه‌نده‌ و له‌ ئه‌گه‌ری دورستبوونی ده‌وڵه‌تدا، ده‌توانێ هاوسه‌نگی هێز له‌ ناوچه‌كه‌دا بگۆڕێ و ئه‌وكات ئێران به‌ ته‌واوی پاشه‌كشه‌ ده‌كات و لاواز ده‌بێت، بۆیه‌ ئێران به‌ ته‌واوی دژایه‌تی ده‌كات. یارییه‌كه‌ زۆر هه‌ستیاره‌ و سعوودیه‌ ده‌یه‌وێ رۆڵی سه‌ره‌كیی تێدا ببینێ و ئێسته‌یش كورد ئاوڕێكی جدیی له‌و هێزه‌ گه‌وره‌یه‌ داوه‌ته‌وه‌.

له‌وكاته‌وه‌ كه‌ كۆندا لیزا رایس وه‌زیری ده‌ره‌وه‌ی ئه‌وكاتی ئه‌مه‌ریكا به‌ روونی باسی له‌ نه‌خشه‌ی رۆژهه‌ڵاتی ناوه‌ڕاستی گه‌وره‌ كردووه‌، قۆناغ و پلانه‌كانی جێگیركردنی نه‌خشه‌كه‌‌، له‌ ئاراسته‌ی سیاسه‌تی داڕێژه‌رانیدا چووه‌ته‌ پێش؟

به‌ڵێ، زۆریش چووه‌ته‌ پێش. ئه‌وه‌ له‌ دۆخی پرسی كورده‌وه‌ به‌ روونی دیاره‌. ئێسته‌ دۆخی كورد له‌ هه‌موو پارچه‌كاندا گۆڕاوه‌. له‌ سه‌ره‌تاكانی ئاشكرابوونی ئه‌و نه‌خشه‌یه‌، حكوومه‌تی هه‌رێمی كوردستان، ئه‌و ناو و قورساییه‌ی نه‌بوو كه‌ ئێسته‌ هه‌یه‌تی. جیا له‌وه‌یش، حكوومه‌تی هه‌رێمی كوردستان كاریگه‌ری له‌سه‌ر كوردانی پارچه‌كانی تر و حكوومه‌ته‌كانی دیمه‌شق، ئه‌نكه‌ڕه‌ و تاران هه‌بووه‌.

گۆڕانكارییه‌كانی سووریا و توركیاش له‌و ئاراسته‌یه‌دان؟

به‌ڵێ. دوو هۆی سه‌ره‌كی بنه‌مای ئه‌و گۆڕانكارییانه‌ن، یه‌كه‌میان سیاسه‌تی هێزه‌ جیهانییه‌كان‌ و دووه‌میشیان سیاسه‌تی هێزه‌ ناوچه‌ییه‌كان. هێزه‌ جیهانییه‌كان كاریگه‌رییان له‌سه‌ر هێزه‌ ناوچییه‌كان هه‌یه‌، بۆیه‌ زۆربه‌ی گۆڕانكارییه‌كان ئه‌گه‌ر رای ئه‌مه‌ریكای له‌سه‌ر نه‌بێت، سه‌ركه‌وتوو نابێت. ئێسته‌ سه‌رده‌می تاك جه‌مسه‌ری نییه‌ و خودی ئه‌مه‌ریكایش ئه‌وه‌ ده‌زانێ و چین و رووسیا به‌خۆ كه‌وتوونه‌. ئه‌و دوو هێزه‌یش كاریگه‌رییان له‌سه‌ر چه‌ند وڵاتێكی ناوچه‌یی وه‌ك ئێران و سووریا هه‌یه‌، بۆیه‌ گۆڕانكارییه‌كان هه‌ندێ ئاسان نین و كاتیان پێویسته‌.

چ ده‌ره‌نجامێك له‌و هاوسه‌نگییه‌ ناوچه‌یی و نێوده‌وڵه‌تییه‌ وه‌رده‌گری؟

سعوودیه‌، ئێران، توركیا و تا راده‌یه‌كیش سووریا، هێزی‌ ناوچه‌یین. ئێران شیعه‌یه‌، به‌ڵام توركیا سوننه‌یه‌‌، ئه‌وانه‌ هه‌میشه‌ دژایه‌تییان به‌ یه‌كه‌وه‌ هه‌یه‌، به‌ڵام چاره‌نووسی ستراتیژی و ژێۆپۆلتیكی به‌ شێوه‌یه‌كه‌ كه‌ ئه‌وان هیچ كاتێك ناتوانن دوژمنایه‌تیی یه‌كتر بكه‌ن، سه‌ره‌ڕای ئه‌وه‌ی سه‌ر به‌ دوو جه‌مسه‌رن، ئێران له‌گه‌ڵ رووسیایه‌ و توركیایش ئه‌ندامی ناتۆیه‌ و له‌گه‌ڵ ئه‌مه‌ریكایه‌. سعوودیه‌یش هێزێكی ناوچه‌ییه‌ و له‌و دواییانه‌دا زۆر رادیكاڵانه‌تر به‌رامبه‌ر به‌ دۆخی ناوچه‌یی و نێوده‌وڵه‌تی هه‌ڵسوكه‌وت ده‌كات، ئه‌مه‌ش زۆر شت ده‌گۆڕێت. به‌دواییانه‌ سعوودیه‌ و رووسیا چه‌ند رێككه‌وتنێكی گه‌وره‌یان ئیمزا كرد و ئه‌مه‌ش بێگومان بۆ لاوازكردنی رۆڵی ئێرانه‌ له‌ ناوچه‌كه‌دا. سعوودیه‌ خاڵی ئابووریی زیاتر به‌ روسیا ده‌دا و ئێرانیش له‌وه‌ نیگه‌رانه‌. گه‌مه‌كه‌ گۆڕاوه‌ و چیتر ئێران ناتوانێ به‌ وه‌ره‌قه‌ی ڤلادیمێر پۆتین یاری بكات، ته‌نانه‌ت سعوودیه‌ رای گه‌یاندووه‌ كه‌ له‌گه‌ڵ دامه‌زراندنی ده‌وڵه‌تی كوردیدایه‌. سعوودیه‌ له‌ ناوچه‌یه‌دا زۆر له‌ ئێران به‌هێزتره‌ و ده‌توانێ گه‌وره‌ترین یارمه‌تیده‌ر بێ بۆ سه‌ركه‌وتنی سیاسه‌ته‌كانی ئه‌مه‌ریكا له‌ رۆژهه‌ڵاتی ناوه‌ڕاستدا.

رووداو و كۆبوونه‌وه‌ ناوچه‌یی و ناوخۆییه‌كان، ده‌ریده‌خه‌ن كه‌ به‌و دواییانه‌ی پارتی دیموكراتی كوردستان زیاتر به‌ره‌و به‌ره‌ی سوننه‌ له‌ ناوچه‌كه‌دا شكاوه‌ته‌وه‌. چوونی كورد بۆ نێو به‌ره‌ی سوننه‌ كه‌ بێگومان ئێران لێی ناڕازییه‌، سیاسه‌تێكی دروسته‌؟

ئه‌وه‌ سیاسه‌تێكی دروسته‌. گه‌وره‌ترین كێشه‌ی مه‌سعوود بارزانی له‌گه‌ڵ شیعه‌یه‌. له‌ رۆژهه‌ڵاتی ناوه‌ڕاستدا، ئاین و نه‌ته‌وه‌ تێك به‌زیون و سیاسه‌تكردنیش ئاسان نییه‌. بارزانی تا ئێسته‌ له‌ ئاستی سیاسه‌تی نێوده‌وڵه‌تی و ناوچه‌یی، زۆر باش هه‌ڵسوكه‌وتی كردووه‌. ئه‌و، له‌ پێگه‌یه‌كی به‌هێزه‌ و هه‌ڵسوكه‌وتی له‌گه‌ڵ رووداو و گۆڕانكارییه‌كاندا كردووه‌. مه‌سعوود بارزانی، پێگه‌ی خۆی ده‌زانێ و ته‌نانه‌ت له‌ زۆر رووی سیاسه‌تی نێوده‌وڵه‌تییه‌وه‌، له‌ پێشه‌وه‌ی ئێرانه‌.

به‌ڵام ئێران هێزێكی كاریگه‌ری ناوچه‌ییه‌ و ئه‌وه‌ش حاشاهه‌ڵنه‌گره‌، باشتر نییه‌ كه‌ هه‌ندێ به‌رژه‌وه‌ندیی هاوبه‌ش له‌گه‌ڵ ئێراندا دروست بكرێت؟

به‌ بڕوای من ئێران نه‌گه‌یشتووه‌ته‌ ئه‌و ئاسته‌ی خۆی له‌ ژێر كۆنترۆڵی وڵاتانی رۆژئاوایی و ئه‌مه‌ریكا ده‌ربێنێت. به‌ هیچ شێوه‌یه‌ك متمانه‌ به‌ ئێران ناكرێ. ئێسته‌ش سیاسه‌ته‌كانی ئێران، دروشمی نه‌مان بۆ ئه‌مه‌ریكای تێدایه‌ و نه‌یتوانیوه‌ رووخسارێكی باش له‌ خۆی نیشان بدات.

سعوودیه‌ش به‌ شێوه‌یه‌كی تر هه‌ر ئه‌و رووخساره‌ی هه‌یه‌، چونكه‌ پشتگیری له‌ گرووپه‌ توندڕه‌وه‌ سه‌له‌فییه‌كان ده‌كات. ئه‌ی چۆن ده‌كرێ سه‌رمایه‌گوزاری له‌سه‌ر سعوودیه‌ بكرێ، به‌ڵام له‌سه‌ر ئێران نا؟

ئێران و سعوودیه‌ له‌ تای ته‌رازووێكدا نین، به‌ڵام نابێ مه‌سعوود بارزانی هه‌موو هێلكه‌كان بخاته‌ ناو سه‌به‌ته‌ی سعوودییه‌وه‌.

ئێسته‌ كورد به‌ روونی به‌سه‌ر دوو به‌ره‌ و ئاراسته‌ی رووسیا و ئه‌مه‌ریكادا دابه‌ش بووه‌، له‌و رووداو و گۆڕانكارییه‌كاندا كام لایه‌ن یان به‌ره‌ی كورد لاواز ده‌بێت؟

ئه‌وه‌ی له‌ به‌ره‌ی پارتیدایه‌، به‌هێز ده‌بێ و ئه‌وه‌ی له‌ به‌ره‌ی په‌كه‌كه‌دایه‌، رۆژ به‌رۆژ لاوازتر ده‌بێت.

هۆكاره‌كه‌ چییه‌؟

زۆر روونه‌، ئه‌وه‌ پێوه‌ندی به‌ سیاسه‌تی نێوده‌وڵه‌تییه‌وه‌ هه‌یه‌. پڕۆژه‌ی نابۆكۆ كه‌ نه‌وت و گاز له‌ ده‌ریای خه‌زه‌ره‌وه‌ به‌ كوردستاندا ده‌گه‌یه‌نێته‌‌ به‌نده‌ری سه‌یحان و جه‌یحان و كۆمپانیا گه‌وره‌كانی ئه‌مه‌ریكا و وڵاتانی رۆژئاوایی جێبه‌جێی ده‌كه‌ن، هێڵی سه‌ره‌كیی پڕۆژه‌یه‌كی گه‌وره‌یه‌. پێش له‌ پڕۆژه‌ی نابۆكۆ، په‌كه‌كه‌ نێوی له‌ كووله‌كه‌ی ته‌ڕیشدا نه‌بوو، به‌ڵام له‌گه‌ڵ ئاشكرابوونی پڕۆژه‌كه‌، رووسیا په‌كه‌كه‌ی به‌هێز كرد. به‌شێكی پڕۆژه‌كه‌ به‌ نێو ئه‌و شوێنانه‌دا تێده‌په‌ڕێ كه‌ ئێسته‌ په‌كه‌كه‌ی لێیه‌ و ئه‌گه‌ر بیانه‌وێ، ده‌توانن زه‌بری لێ بده‌ن.

به‌ڵام پارتی دیموكراتی گه‌ل كه‌ نزیكه‌ له‌ په‌كه‌كه‌، توانی به‌ربه‌رستی 10%ی ده‌نگه‌كان هه‌ڵبژاردنی توركیا تێپه‌ڕێنێ و سه‌ركه‌وت. له‌ رۆژئاوای كوردستانیش، پارتی یه‌كێتی دیموكرات كه‌ باڵی سووریای په‌كه‌كه‌یه‌، سه‌ركه‌وتنی گه‌وره‌ی تۆمار كردووه‌. باشه‌ ئه‌وه‌ كوێی نیشانه‌ی لاوازبوونی په‌كه‌كه‌یه‌؟

من ده‌ڵێم لاواز بووه‌، نه‌ك ئه‌وه‌ی كه‌ به‌ ته‌واوی له‌ناو چووه‌. په‌یه‌ده‌ ئێسته‌ له‌ سووریا دژی داعش شه‌ڕ ده‌كات و فڕۆكه‌كانی ئه‌مه‌ریكایش هاوكارییان ده‌كه‌ن. ئه‌وه‌ روونی ده‌كاته‌وه‌ كه‌ ئه‌مه‌ریكا هه‌ڵوێسته‌كانی به‌رامبه‌ر به‌ په‌كه‌كه‌ ده‌گۆڕێت. هاوكات ئه‌وه‌ش به‌ په‌كه‌كه‌ ده‌ڵێ كه‌ ده‌بێ له‌ رووسیا دوور بكه‌وێته‌وه‌. ده‌بێ سیاسه‌تی په‌كه‌كه‌ بگۆڕدرێ و واز له‌ سیاسه‌تی سانترالیزم بێنێت. ئه‌گه‌ر سه‌یری توركیاش بكه‌ین، بۆمان ده‌رده‌كه‌وێ كه‌ ره‌جه‌ب ته‌یب ئه‌ردۆغانیش هه‌ندێ هه‌ڵه‌ له‌ هه‌ڵبژاردنه‌كاندا كردووه‌ و ئێسته‌یش كه‌ هه‌ده‌په‌ به‌ربه‌رستی 10%ی شكاندووه‌، خۆ رۆژئاوا پێی ناخۆش نییه‌ كه‌ ئه‌و حزبه‌ بچێته‌ قۆناغێكی تری سیاسه‌ت.

ئه‌وه‌یش هه‌ر له‌ ئاراسته‌ی سیاسه‌ته‌كانی ئه‌مه‌ریكادا نییه‌؟

هه‌ر وایه‌ و ده‌بێ خه‌باتی چه‌كداری له‌ توركیا، لاواز ببێته‌وه‌. به‌وه‌، باڵی سه‌ربازیی په‌كه‌كه‌ به‌ ته‌واوی لاواز ده‌بێ و باڵه‌ سیاسییه‌كه‌ی له‌ په‌رله‌ماندا، به‌هێز ده‌بێت. ئه‌گه‌ر په‌كه‌كه‌ له‌و ئاراسته‌یه‌دا هه‌نگاو بنێ، سه‌ركه‌وتوو ده‌بێ و مه‌سعوود بارزانیش نایه‌وێ هێزی خۆی نیشان بدات و بڵێ په‌كه‌كه‌ به‌ ته‌واوی له‌ناو ده‌به‌م. هه‌ر ئه‌وه‌ی كه‌ ئێسته‌ په‌كه‌كه‌ له‌ قه‌ندیل شوێنی بۆ دیموكراته‌كان چۆڵ كردووه‌، ئه‌وه‌ یه‌ك له‌ نیشانه‌كانه‌.

ئێران و په‌كه‌كه‌ پێوه‌ندیی به‌هێزیان هه‌یه‌، ئه‌ی چۆن ئێران ئه‌وه‌ له‌ په‌كه‌كه‌ قبووڵ ده‌كات كه‌ شوێن بۆ دیموكراته‌كان چۆڵ بكات؟ مادام وایه‌ ده‌بێ په‌كه‌كه‌ له‌ ئێران دوور كه‌وتبێته‌وه‌، ئه‌وه‌ ده‌بێ راست بێت؟

بێگومان وایه‌.

ده‌بێ وابێت؟ یان له‌ راستیدا وایه‌؟

من ده‌ڵێم ده‌بێ به‌و شێوه‌یه‌ بێت. ده‌بێ عه‌له‌وییه‌كانی ناو په‌كه‌كه‌ كه‌ پێشتر له‌گه‌ڵ ئێران بوون، سیاسه‌تیان به‌ ته‌واوی بگۆڕن و له‌گه‌ڵ به‌رژه‌وه‌ندی نه‌ته‌وه‌یی كورددا بێت.

Be the first to comment

وەڵامێک بنووسە

پۆستی ئەلکترۆنیکەت بڵاو ناکرێتەوە .